Ĉi tiu paĝo estas provlegita
NATAN
Ho, sultan’, mi volas
Vin servi tiel, ke estonte mi
Meritos plu la klientecon vian.
SALADIN
Min servi?
NATAN
Vi la plejbonaĵon havos
El ĉio; vi ĝin havos plej malkare.
SALADIN
Pri kio vi parolas? Mi esperas,
Ke ne pri varoj? — Ja kun vi marĉandos
Fratino mia. (Jen, subaŭdantino!) —
Ne al la komercisto mi min turnis.
NATAN
Do vi sendube volas scii, kion
Dumvoje mi rimarkis aŭ renkontis
De l’ malamiko, kiu removiĝas? —
Nu, se malkaŝe mi paroli devas…
SALADIN
Ne, ankaŭ tion mi kun vi ne celis…
Pri tio mi jam scias, kion mi
Bezonas. — Unuvorte…
NATAN
Do ordonu.
SALADIN
Mi volas, ke vi min instruu pri
Afer’ alia, tutalia. — Ĉar vi
Ja estas tiom saĝa: al mi diru
Do kia leĝo, kia religio
Plej saĝa al vi ŝajnas?
