Ĉi tiu paĝo estas provlegita
DERVIŜO
Kaj li jam estas tia! — La trezoro
Je ĉiu sunsubiro estas pli
Malplena ol malplena; ĉar la fluso,
Matene alta, ĉiam jam defluis
Tagmeze…
NATAN
Ĉar forglutas ĝin kanaloj
Neplenigeblaj kaj krom tio ankaŭ
Ja neŝtopeblaj.
DERVIŜO
Jes, vi estas prava!
NATAN
Mi tion konas.
DERVIŜO
Tamen ja ne taŭgas,
Se princ’ vulturo estas ĉe kadavroj.
Sed se kadavr’ li estas ĉe vulturoj,
Dekoble malpli taŭgas.
NATAN, kontraŭdire
Nu, derviŝo!
DERVIŜO
Facile estas babiladi! — Bone:
Do ofru[1] sumon por ofico mia!
NATAN
Nu, kiom ĝi al vi do enspezigas?
DERVIŜO
Ne multe. Sed por vi ĝi profitiĝus.
Ĉar se malpleno estas — kiel ofte —
Malfermu viajn kluzojn: pruntedonu
Kaj por vi prenu kiom ajn procentojn.
- ↑ ofri = F: offrir, A: offer, G: offerieren, anbieten.
