mondo utera, same tiel estas necese, ke ĉio bezona por la Regno de Dio, ĉiuj fortoj de la pli alta Regno devas esti akirataj ĉi tie.“
„Kion li bezonas, forpasinte en tiu ĉi mondo en la alian? Tiu mondo estas mondo de sankteco, tamen estas necese, ke li akiru sanktecon jam en tiu ĉi mondo. En tiu mondo estas bezona brileco, tial li devas akiri ĉi tiun econ en tiu ĉi mondo. Ĉar tie oni bezonas la spiritecon, tial tie ĉi oni devas jam posedi ĝin. En tiu mondo la fido, la certeco, la scio pri Dio, la amo al Dio estas bezonataj. Tiujn ĉi ecojn oni devas havigi al si, por ke, suprenirinte el tiu ĉi mondo en la alian senmortan mondon, oni trovu ĉion preta, kion oni bezonas en la eterna vivo.“
„Estas evidente, ke tiu mondo estas mondo de lumoj; tial estas bezono de lumigo. Tiu mondo estas mondo de amo; tial amo al Dio estas bezonata. Tiu mondo estas mondo de perfekteco; perfekteco devas esti akirita ĉi tie. Tiu mondo estas mondo de spiroj de la Sankta Spirito kaj en tiu ĉi mondo oni devas akiri ilin. Tiu mondo estas mondo de la vivo eterna; en tiu ĉi mondo la individuo devas akiri eternecon. Kiel li akiru ĝin? Li akiras ĝin per la scio pri Dio, per la amo al Dio, per fido, per bonfaraj agoj, per sindonemo, per sankteco kaj spiriteco. Se li ne akirus tiujn ĉi ecojn, se li ne atingus tiujn ĉi necesaĵojn, certe li estus senigita de la vivo eterna. Sed se li atingos la scion pri Dio, se li ekflamos per la fajro de la amo al Dio, se li vidos la grandajn kaj potencajn Diajn signojn, se li estos la kaŭzo de amo inter la homaro, kaj se li vivos en la plej alta stato de sankteco kaj spiriteco, tiam certe li atingos la duan naskiĝon, tiam certe li estos baptita de la Sankta Spirito, kaj tiam certe li vidos la vivon eternan.“
— ALLAH’U’ABHÁ! —
